حيدرآباد (ويب ڊيسڪ) سنڌ ۾ ڪمند جو انتهائي خطرناڪ مرض ظاهر ٿي پيو آهي، سنڌ آبادگار بورڊ جي نشاندهي کان پوءِ زراعت کاتي پنهنجي فيلڊ عملي کي هاءِ الرٽ ڪري ڇڏيو آهي. ان سلسلي ۾ مليل ڄاڻ موجب سنڌ آبادگار بورڊ سنڌ ۾ ڪمند کي هڪ انتهائي خطرناڪ مرض لڳڻ جو پتو لڳايو آهي جنهن سان وڏي پيماني تي ڪمند تباهه ٿي وڃي ٿو. سنڌ آبادگار بورڊ ان مرض جي سڃاڻپ ڪرڻ ۽ ان کي ختم ڪرڻ لاءِ زراعت کاتي جي ماهرن کان مدد گهري ورتي آهي، جنهن کان پوءِ زرعي توسيع کاتي سنڌ ۾ پنهنجي فيلڊ عملي کي هاءِ الرٽ ڪري ڇڏيو آهي. ان سلسلي ۾ سنڌ آبادگار بورڊ طرفان ٻڌايو ويو آهي ته ڪمند کي اهو نئون ۽ انتهائي خطرناڪ مرض ٽنڊي الهيار ۾ ڪجهه هنڌن تي ظاهر ٿيو آهي، ان بابت ٻڌايو ويو آهي ته اهو مرض ٽنڊي الهيار ۽ سڪرنڊ ۾ گذريل سال ظاهر ٿيو ۽ اٽڪل 40 ايڪڙ ڪمند ان مرض سبب تباهه ٿي ويو. جنهن کان پوءِ هاڻي ان ئي مرض جا آثار ٽنڊي الهيار ضلع ۾ ئي ڪجهه ٻين هنڌن تي به نظر آيا آهن. اهڙي صورتحال کي ڏسندي سنڌ آبادگار بورڊ ترت ئي ان معاملي تي لاڳاپيل زرعي ماهرن سان رابطو ڪيو آهي، ان سلسلي ۾ زرعي توسيع کاتي توڙي شگر ملن جي ماهرن سنڌ آبادگار بورڊ سان گڏجاڻي ڪري آبادگارن کان ڄاڻ ورتي ۽ٽنڊي الهيار ۾ مختلف هنڌن تي پوکيل ڪمند ۾ ان مرض جو جائزو پڻ ورتو . هوڏانهن سنڌ آبادگار بورڊ جي نشاندهي کان پوءِ زرعي توسيع کاتي سنڌ جي ٽيڪنيڪل ڊائريڪٽر علي نواز چنڙ فوري طور تي حيدرآباد، ميرپور خاص، سکر ، شهيد بينظير آباد ۽ لاڙڪاڻي جي زرعي توسيع کاتي جي ڊويزنل ڊائريڪٽرن کي هڪ خط لکي لاڳاپيل فيلڊ عملي کي فوري طور تي هاءِ الرٽ ڪري سمورن ضلعن اندر ڪمند جي آبادگارن ۽ شگر ملن جي انتظاميا سان رابطا ڪري ڪمند جي ان نئين مرض جي موجودگي بابت پتو لڳائڻ لاءِ سروي ڪرڻ جو پڻ حڪم ڏئي ڇڏيو آهي.
234
