نيب اڳوڻي ناڻي واري وزير حفيظ شيخ ۽ ٻين خلاف ريفرنس داخل ڪرڻ جي سفارش ڪري ڇڏي

اسلام آباد (ويب ڊيسڪ) نيب چيو آهي ته اڳوڻو ناڻي وارو وزير عبدالحفيظ شيخ، اڳوڻو ايف بي آر چيئرمين عبدالله يوسف، اڳوڻو ايف بي آر چيئرمين سلمان صديقي ۽ ٻيا اختيارن جي ناجائز استعمال ۾ ملوث جوابدار آهن، رپورٽ مطابق نيب ڪراچي جي ڊائريڪٽر جنرل ڊاڪٽر نجف قلي مرزا جي سربراهي ۾ نيب ڪراچي جي ريجنل بورڊ جو اجلاس ٿيو. جنهن ۾ مختلف شڪايتن ۽ جاچن تي ڳالهيون ڪيون ويون. جڏهن ته ريجنل بورڊ 2 ريفرنس داخل ڪرڻ ۽ 2 شڪايتن کي جاچن ۾ تبديل ڪرڻ جي سفارش ڪئي. نيب چيو آهي ته ان سمورن منظور ٿيل ڪيسن ۾ ناڻي کي ڪروڙين روپين جو نقصان پهچايو ويو هو. نيب موجب بورڊ لينڊ يوٽيلائزيشن ڊپارٽمينٽ بورڊ آف روينيو جي آفيسرن، عهديدارن ۽ ٻين خلاف ريفرنس داخل ڪرڻ جي سفارش ڪئي وئي آهي. اڳوڻي ميمبر لينڊ يوٽيلائيزيشن ڊپارٽمينٽ جوابدار غلام مصطفيٰ ڦل، ڊپٽي ڪمشنر ۽ اي ڊي او آصف ميمڻ ۽ ٻين قيمتي سرڪاري زمين کي ڀڳڙن جي مٺ تي غيرقانوني الاٽمينٽ ڪئي ۽ اختيارن جو ناجائز استعمال ڪيو. جنهن سبب قومي ناڻي کي ڪروڙين روپين جو نقصان پهچايو ويو. نيب طرفان جاري ڪيل بيان ۾ ٻڌايو ويو آهي ته ڊاڪٽر عبدالحفيظ شيخ، عبدالله يوسف، سلمان صديقي ۽ ٻيا اختيارن جي ناجائز استعمال ۾ ملوث آهن. جوابدارن سرڪاري ناڻي کي 11 ملين آمريڪي ڊالر جو نقصان پهچايو آهي.  نيب پاران جاري ڪيل بيان موجب بورڊ اجلاس ۾ بورڊ ڊپٽي ڪمشنر، ضلع غربي ڪراچي جوابدار فياض سولنگي ۽ ٻين جي خلاف جاچ جي اجازت ڏني. جوابدار فياض سولنگي مختلف ڪرپشن ۽ بدعنواني جي ڪيسن ۾ ملوث آهي.