ڪراچي (ويب ڊيسڪ) سنڌ جي وڏي وزير سيد مراد علي شاهه سان هنگري جي سفير بيلا فازڪس وزيراعليٰ هائوس ۾ ملاقات ڪئي. ملاقات ۾ ٻطرفن لاڳاپن ۽ گڏيل دلچسپي جي معاملن تي خيالن جي ڏي وٺ ڪئي وئي. ان موقعي تي هنگري جي سفير چيو ته سندس ڪراچي جو پهريون دورو آهي ۽ هنگري سان ڪراچي جا لاڳاپا پاڪستان جي قيام کان شروع ٿيا. سنڌ جي وڏي وزير هنگري جي سفير کي ٻڌايو ته ڪراچي هڪ تاريخي بندرگاهه وارو شهر آهي ۽ ان جي ساحلي پٽي ۽ تاريخي عمارتون ڏسڻ وٽان آهن. هن وڌيڪ چيو ته هنگري جي پرڏيهي وزير به ڪجهه عرصو اڳ ڪراچي جو دورو ڪيو هو. هنگري جي سفير چيو ته ڪراچي ۾ سيڙپڪاري جا مختلف موقعا ڳولي رهيا آهيون ۽ اسان واٽر سيڪٽر منصوبي سميت فوڊ انڊسٽري، ڊيري ۽ پائيدار زراعت ۾ سيڙپڪاري ڪرڻ چاهيون ٿا. سنڌ جي وڏي وزير چيو ته سنڌ حڪومت هنگري جي سيڙپڪارن کي هر قسم جون سهولتون فراهم ڪندي. سنڌ جي وڏي وزير چيو ته سيڙپڪاري کاتو ۽ پي پي پي يونٽ هنگري سفارتخاني سان رابطو ڪندا ۽ هوءَ پاڻ به سيڙپڪارن سان ملندو. سنڌ جي وڏي وزير چيو ته اسان چاهيون ٿا ته هنگري جون ڪمپنيون سالڊ ويسٽ مئنيجمينٽ، واٽر سپلاءِ، صفائي سٿرائي ۽ ٽرانسپورٽ جي شعبن ۾ سيڙپڪاري ڪن.
156
