انقره (م ڊ) سنڌ حڪومت طرفان ترڪي کي سنڌ ۾ پنهنجا گاڏين جا مينيو فيڪچرنگ پلانٽس لڳائڻ جي دعوت ڏيندي چيو آهي ته پرائيويٽ پارٽنرشپ معاهدن تحت ترڪ سيڙپڪارن کي سهولتون ۽ سبسڊي ڏني ويندي. سڌ سماءُ، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ انقره ۾ ترڪي جي ٽرانسپورٽ واري نائب وزير سيلِن دورسن سان ملاقات ڪئي ۽ ٽرانسپورٽ جي شعبي ۾ ترڪي جي ڪاميابين کي ساراهيو. ان موقعي تي شرجيل انعام ميمڻ ترڪي جي نائب وزير سان ڳالھائيندي ترڪي جي ڪمپنين کي پاڪستان ۽ خاص ڪري سنڌ صوبي ۾ پنهنجا ٽرانسپورٽ گاڏين جا مينيو فيڪچرنگ پلانٽ لڳائڻ جي دعوت ڏني. صوبائي وزير چيو ته سنڌ حڪومت پبلڪ پرائيويٽ پارٽنرشپ معاهدن تحت ترڪ سيڙپڪارن کي سهولتون ۽ سبسڊي ڏيڻ لاءِ به تيار آهي. صوبائي وزير ترڪي جي ٽرانسپورٽ واري نائب وزير کي گذارش ڪئي ته ترڪي جي بسن ۽ ماس ٽرانزٽ گاڏين جا تفصيل ۽ ڊزائين بابت ڄاڻ ڏني وڃي. شرجيل انعام ميمڻ ترڪ ماهرن کي سنڌ جو دورو ڪرڻ جي به دعوت ڏني ته جيئن معاملي تي اڳڀرائي ٿي سگهي.
137
